Mark 8
Kweivas tawsan tawaw ivakamus
(Matiw 15:32-39)
1Misiya̱mun towen, babaw gamag nikatuyouns nimekes vayuwein Yeisuw, nag ivag kaeis beikams, mo idawes navamul, imekes, idibakes, ilana, “Bo inok nuwag gamag tasiyas babaw nikanatouns waseg yey, kaeis gog nag.3“Kukin bakayabes bineis wasiven asimoun-wan, adok bisoumats wa̱ked. Peinan mwasanin siven kadiveiyov.”
4Iweis navamul tasiyas, ilansa, “Ven to nawoud makaw; ama̱wan bitavakamus gamag tasiyas? Kan gog nag.”
5Iw to Yeisuw, ilana, “Akweivin amibled?”
Ilansa, “Kweinim kweiy.”
6Idibakes gamag babaw, ilana, “Kusinis wapwepway.” Wankuyeim mo ikow bled siyas kweinim kweiy, ikalin nuwan Yowbad waseg, ikivis bled siyas, isekes navamuls va̱gan bivaganes; mo ikawes isekes babaw gamag wasigeis.
7Asiyin mwanayun-wan nisesus, ikow wanaman, mo initoug Yowbad waseg, ikalin nuwan peinan in. Ikous, mo idibakes navamul va̱gan bikawes bisekes babaw gamag, mo isekes.
8Babaw gamag ikamkwams, bo ikamuweips, mo ikatikunakus kan towen nikambwages, mo idagis wagamwat, imlavag gibsinim gibsiy.
9Ikous, mo ikayabes tasiyas kweivas tawsan gamag, inounas; mtowen siney navamul itouws wa̱wag, idopels ineis ven Dalmanut.
Gamag sivines Yeisuw naman mulin bikines
(Matiw 16:1-4)
11Tasiyas Palisiy mwasanin mo inekes Yeisuw, ikammnimans, mamagina iyakwanes, ilansa, “Kuvag muwotet bitawtoun ma̱wana naman mulin Yowbad.”12Yeisuw gog singay igeg nanon, ilana, “Gudwouvaws yakamiy sivinamiy bukukines Yowbad naman mulin,” mo itabudabod, ilana, “Nag bukukines, nag.”
13Vayuwein mo ilisawes, itouws wa̱wag, idopels ineis palatan.
Ansinap Elod o Palisiy asisinap ma̱wana yist
(Matiw 16:5-12)
14Tage bo inumlaves kaeis; misinaka katanoka bled wa̱wag.15Yeisuw mo iguyes, ilana, “Kuvna̱seimiy. Kadiloka kupiyaves tasiyas Palisiy asiyist o Elod anayist.”
16Iliganes, idibakes sisiyas, ilansa, “Adok anakabebay, peinan tanumlaves adableds.”
17Yeisuw gog ikakina ninous, idibakes, ilana, “Wawun kulansa, ‘Tanumlaves adableds’? Singay tatagouwaws yakamiy; ninoumiy nag.
18“Sam mitamiy tage nag kuwtusis; sam tigamiy tage nag kuliganes beibwein. Adok nag kunuways akivis kweinim bled silma̱nin kweinim tawsan gamag, kweivin kaynad kan nikambwages mo kwatikunakus, ne?”
Ilansa, “Sinawatan kadiney.”
20Vayuwein Yeisuw ikatiga̱nes, ilana, “Wankuyeim akivis bled kweinim kweiy silma̱nin kweivas tawsan gamag, kweivin gamwat kan nikambwages mo kwatikunakus, ne?”
Ilansa, “Gibsinim gibsiy.”
21Iwa̱ge Yeisuw, ilana, “Igawa tatagouwaws yakamiy!”
Toukwaw teitan ivag ibwein
22Wankuyeim Yeisuw inoun in Beteseid, imeyes takatoun teitan, ilansa, “Tabta bukwabkwen matan toukwaw towen, ne?”23Yeisuw iligen, ivakaben, inow watoulan ven, igus matan, naman waseg ikabkwen, ikatigan, ilana, “Kukin tan?”
24Itamnow matan, ilana, “Akin gamag mwasanin, tage askakin ma̱wana amweilok ininounas.”
25Vayuwein mo ikabkwen matan, mo ikinbunik, bo ibwein.
26Yeisuw mo ikayeb beiyum bein wanbunatum, ilana, “Awoum bukun waven.”
Pita ikakina Yeisuw nawotet
(Matiw 16:13-20; Luk 9:18-21)
27Wankuyeim Yeisuw siney navamul ita̱vins wunsiyas ven wawnuwan Sisaliy, guyaw towen Pilip nikaleiwag wasigeis. Inounas wa̱ked, ikatiga̱nes navamuls, ilana, “Gamag idokeigs kal yey?”28Iweis tasiyas, ilansa, “Gamag mwasanin idokes ya̱koum tabibapta̱ysein gamags towen Yon; tage mwasanin idokeims Ilaytiy yak, o mwasanin idokeims ya̱koum palopit teitan.”
29Yeisuw mo ikatiga̱nes, ilana, “Tage yakamiy, kudokeigs kal yey?”
Iw to Pita, ilana, “Yak Kelis yak.”
30Mapuna Yeisuw idibakes, ilana, “Awoum gamag mwasanin bikakinsa yey Mesay Kelis yey; awoum kwamteleigs; awoum.”
Yeisuw ilivnek peinan bikanig mo beikit vayuwein
(Matiw 16:21-28; Luk 9:22-27)
31Wankuyeim mo ikatimlakes, ilana, “Gimgilitoun yey, kadiloka a̱bag bigeg singay; kadiloka bipiyaveigs tasiyas tammwayas sisiyas tanuwgwes lun situwa̱vek sisiyas takatimlakeins kaleiwag, mo bikatimateigs; yam kweitoun mo ba̱kit vayuwein.”32Anilivan towen kamnat; toge Pita ika̱nan, ilana, “Awoum kulivan ma̱wan.”
33Yeisuw itouvin, ikin navamuls, ikan Pita, ilana, “Kusineikik ya̱koum Seitan, amsinap ma̱wana gamag asisinap, nag ma̱wan Yowbad ansinap.”
34Ikous, mo idawes gamag babaw sisiyas navamuls, ikatuyouns imekes, mo idibakes, ilana “Kavel tan yakamiy sivinan bibkunig, kadiloka bipiyev nakaleiwag tatonen mo bikokew anklos tatonen va̱gan mo bibkunig.
35“Kavel-tan yakamiy sivinan bikayus mwamovan mo biyamkwen, tage kukin biyamkwen mwamovan peinan gunawotet, mo bises bwein.
36“Kukin gog bikow wuliyoug meivek-wan, ven watinow wuliyougwan, mo biyamkwen mwamovan, adok nag bimwa̱saw, nag.
37“Aveiyag mo bisek maysan silma̱nin mwamovan, ne? Nag.
38“Tut towen gudwouvaws tappeyaws o asisinap babaw kalbaleb. Tage kukin kal bimsin agulivan mamagina bimseneig Gimgilitoun yey; o yey-vak ma̱wan igaw tamag mititeilin waseg ba̱yum bam sigwey Yowbad nataka̱yobs, mo beivag agumwasin gamag towen waseg.”
Copyright information for
MYW